نصايح مهمه للبنات فى فترة الخطوبه, خليها تكمل على خير احسن
لو ربنا فك عقدتك واتخطبتى فاليكى نصائح هامه حتى تاخذى بخطيبك من
مركب الخطوبه اللى محدش عارف هترسى على ايه الى مثواه الاخير فى قفص
النسانيس قصدى قفص الزوجيه السعيد
اجمل ما فى الخطوبه العزومات الرومانسيه على احلى محلات اكل فى البلد واللى عمرك ما هتشوفيها تانى بعد الجواز
المهم النصايح ليكى عند اى عزومه مع خطيبك قلنا رقه
1-الاول لازم تعرفى ان الشوكه والسكينه بيتمسكوا من ايديهم من الطرف يعنى مش من الوسط
2-العيش اوعى تفضحينا وتقطعيه بسنانك ولا الرغيف نصين بايدك وكل نص تاكليه وتحشرى....اوعى
العيش
بيتقطع بالسكينه فى الطبق وبعدين تاخدى لقمه لقمه بالعافيه قال يعنى نفسك
مسدوده اضغطى على نفسك وعلى اعصابك جدااااا وبعدين لما تروحى ابقى كملى زى
ما انتى عاوزه
3-الشوربه اتوسل اليكى بند الشوربه دا مهم اوى اوى
الشوربه تتشرب من غير صوت خالص ومن غير ما تقعدى تنفخى فيها زى القهوجى اللى بينفخ للزبون فى الحجر
بالمعلقه وبدون صوت سخنه ولعه برضه تتشرب بدون صوت
4-الرز طبعا بيتاكل بالشوكه اوعى ايدك تتمد عى المعلقه وتغرفى من طبق الرز وتعبى اوعى الرز بالشوكه وكانك بتبوسيه مش بتاكليه
5-المكرونه الاسباجتى برضه بالشوكه تتلف على طرف الشوكه لحد ما تخلص وبعدين تحطيها فى بؤك من سكات مش تشفطى المكرونه عود عود
6-السمك مشكله لا مش مشكلة دا مصيبة شوفى بتفصلى اللحم عن الشوك ازاى اقولك بدل الفيلم الهندى دا ... نصيحه متكليش السمك خالص
قولى مبحبش السمك وخلصى نفسك
7- الفاكهه لو فيها بذر طلعيه من بؤك بالراحه وحطيه فى ايدك وهى مقفوله اوعى يا حبيبتى من اى نظام تانى مينفعش نظام التفتفة دا هناك في البيت مش عاوزين فضايح قدام الراجل
8-
لما تخلصى اكل تحطى ايدك على بطنك اللى عصافيرها بتصوصو من الجوع وتقوليله
مش ممكن انا عمرى ما اتفجعت كدا انا ادامى اسبوع هبطل اكل فيه
وبعدين تمسكى الفوطه اللى دايما موجوده على الترابيزه من غير لازمه
وتبوسيها ال يعنى بتمسحى بؤك
وبعدين
تستاذنى منه لدخول التواليت لاصلاح مكياجك وتدخلى التواليت وتطلعى منه لفه
الفول والطعميه اللى انتى جايباها معاكى وبالهنا والشفا
موضوع: اسمعوا الكلام وبلاش فضاااااااااااايح 
الإثنين أكتوبر 25, 2010 2:52 pm
